Plano Rodoviário Nacional 2000

Circunloquio

Que sensación de estar fóra de xogo ¡
Recurro á filosofía para facer máis soportable a espera. Mais... a cal modelo me apunto? Ao modelo narcisista da salvación persoal? Quizáis ao da revelación clarividente e inspirada do máis oculto? Ou ben o que descifra a totalidade e o destino? Ao que prohibe as transgresións intelectualis e vixila os límites do saber? Ou, por fin, o que pon á filosofía ao servizo da relixión ou a ciencia? É claro: preciso do primeiro, necesito asegurar a salvación para, pasado este período nefasto, ter azos para seguir aspirando a unha paz e tranquilidade de espíritu maior.
Porque cando as tecnoloxías da información e a comunicación, cando a industria aeronáutica e aeroespacial, cando o sector da biotecnoloxía e das enerxía renovables prometen grandes oportunidades de negocio, nós, enlamados nesta miseria envisgada, apenas podemos ver morrer os días sen que o desánimo poida máis que a desesperación. Aínda sabendo que a materia non só consiste en partículas, senón tamén en ondas nada impide que sexan precisamente estas últimas as que dominen as propiedades da materia a temperaturas ultrabaixas. En canto ás partículas... agora é o tempo dos bosóns, polo do agrupamento, mais xa chegará a oportunidade aos fermións para que cada unha recupere a súa individualidade.
Da mesma forma que cando comprobamos a cotío o inaxeitado da idea de progreso (que é só duns poucos e a costa de esquilmar a natureza), no tocante da máis acaída de desenvolvemento sustentable, do inaxeitado da propiedade privada para soster a chamada "propiedade intelectual", de cando a catástrofe ecológica avanza inexorable sen que as empresan asuman a súa responsabilidade corporativa, de cando surxen como cogumelos novos opios de relixións postmodernas, de cando as implicacións socio-éticas dos novos avances tecno-científicos ameazan con complicalo todo, aínda máis do que está, nós, asqueados de tanto papanatismo e invecilidade apenas podemos erguer a cabeza e ollar libremente, de tan grande desacougo que sentimos ao repensar o que puido ter sido e o que finalmente foi.
Aínda máis, cando a masa informe ameaza con invadilo todo, cando a alienación é algo máis que unha verba caduca, cando o futuro non deixa nengunha escapatoria digna e aceptable, é o momento de profundar democraticamente nas diferenzas e manterse firmes no mundo interior para acumular coa reflexión forzas e razóns esperando a ocasión, que virá, de reconquistar o espazo social e comunitario vertebrado, daquela, por vieiros de racionalidade, participación, intelixencia e solidariedade. "As aldeias do xisto ficam à espera"

Amparémonos no bilingüísmo

Hai anos nunca pensei que tivese que recorrer a esta reivindicación. Daquela aínda era posible loitar por outra situación, por outra realidade. Hoxe, a piques de principiar a segunda década do século XXI (xa sei, para algúns xa se iniciou hai meses) a evidencia dos feitos imponse. Ou erguemos un dique de contención defensivo no noso terreo ou non imos poder impedir que as forzas e correntes do uniformismo e a imposición rematen por asulagalo todo.

Cómpre ser realistas. A situación é grave, preocupante. Estamos ao borde do abismo e segundo eminentes lingüístas e sociologos, de non mediar cambios drásticos, dentro de dúas xeracións non haberá galegofalantes iniciais.

"En dúas xeracións non vai haber galegofalantes iniciais, se non mudan as políticas actuais". H. Monteagudo.

"Estamos ao borde do abismo, se non o evitamos, o galego e lingua premorta, ten 50 anos de historia viva". Fermin Bouza no seminario do CCG.

Temos que contentarnos intelixentemente co posible pois semella evidente que outras pretensións, que nun tempo foron metas razoables, hoxe son para nós inalcanzables.

Debemos, pois, reclamar que efectivamente os galegos das novas xeracións sobretodo, poidan ser realmente quen de coñecer e usar os dous idiomas: o propio e o tamén oficial en todo o Estado.

Cando todos os estudos sociolingüísticos indican o declinar do noso idioma o pertinente, nesta altura, é esixir que se cumpra a lexislación primixenia e impedir que a secundaria se aplique en clara oposición a aquela.

Força

Celebrado reencontro

Rematamos de dar a benvida, de novo, aos multicines Compostela.
Non puido ser máis afortunado o reencontro. O film Fish Tank está á altura de tan feliz acontecemento. Mira que vén sendo dificil reterme durante máis de dúas horas pendente dunha pantalla; pois ben, esta historia conseguiuno. A directora, Andrea Arnold logrou que me interesase pola narración e que sentise, por momentos, emoción e complicidade. Recoméndoa para os que gosten do cinema limpo, escueto, espido e franco, lonxe de efectismos e complementos.
Sempre é de celebrar a (re)apertura dunhas salas de cinema (aínda que algunhas sexan, de tan reducido tamaño, prácticamente tan cómodas como o salón da casa).
Agardemos que estes multicines non teñan que volver poñer o candado. Aínda que teño que confesar que na sesión en que fomos estabamos só os dous. Non é un bó dato. Quizáis o asunto mellore, pois de luns a xoves tamén dan a merenda. Mais, non deben esquecer, os programadores, que a mellor mantenza é o cinema, só cinema de calidade.