Daranse novas batallas

Despois do breve paso polo goberno da esquerda transformadora, onde a penas tivo tempo para poñer en marcha unhas cantas medidas e tomar algunhas decisións, os poderes fácticos de sempre dispóñense a acadar novas metas unha vez conseguido o obxectivo de volver a ter o cabo e o timón ben suxeitos da súa man (por un momento percibiron que mans alleas trataban de endereitalos).
Como digo as medidas tomadas e os instrumentos creados foron moi limitados pero cun gran xérmolo transformador. Os de sempre percibiron o perigo e tomaron cartas no asunto. Non máis contemplacións. Non máis condescendencias. Recuperemos o que é "noso" e, fagámolo, canto antes. Empreguemos todos os medios ao noso dispor (que non son poucos). Ante situacións excepcionais cómpre usar todas as medidas e recursos que sexa mester (xa se fixo antes cuns resultados que a historia nos mostra con claridade, para quen os queira ver).
Agora xa anuncian que van ir polos concellos. Quérenno outra vez todo e, desta vez, non deixarán que se lles escape tan doadamente. Contan con moitos partidarios, con medios, con influenza e co poder difuso e solapado (que é sempre o máis efectivo).
Tanta é a borracheira, tanto o desenfreo, tanto o atrevemento, que mesmo rivalizan sen pudor nos seus medios acerca de quen tivo máis mérito, sobre quénes fixeron a mellor xogada, quen a colou máis grande, en definitiva sobre quen manipulou, terxiversou, ou, directamente, mentíu máis.
O brillante Manuel Rivas expresao con precisión na súa columna semanal.